बर्दिया राष्ट्रिय निकुञ्जमा बाघको आक्रमणमा परी निकुञ्जकै हात्तीसारमा कार्यरत कर्मचारी माउतेको मृत्यु

बर्दिया,भदौ १९ गते । बर्दिया राष्ट्रिय निकुञ्जमा बाघको आक्रमणमा परी निकुञ्जकै हात्तीसारमा कार्यरत कर्मचारी माउतेको मृत्यु भएको छ । ठाकुरबाबा नगरपालिका–७ मोहनपुर घर भएका ४२ वर्षीय मंगरु थारुको पाटे बाघको आक्रमणपछि मृत्यु भएको हो । निकुञ्ज भित्रको गैंडा मचान नजिकै हात्तीलाई घाँस काट्न गएका थारुको बाघको आक्रमणमा परी मृत्यु भएको बर्दिया राष्ट्रिय निकुञ्जका रेञ्जर हर्षबहादुर सिंहले जानकारी दिए । लामो समयदेखि निकुञ्जमै कार्यरत थारुको मृत्युले निकुञ्ज प्रशासनलगायत संरक्षणकर्मी स्तब्ध बनेका छन् । थारु २२ वर्षदेखि हात्तीसारमा करार कर्मचारीको रुपमा कार्यरत थिए । हात्ती लिएर जंगल पसेका उनी हात्तीबाट ओर्लिएर हात्तीलाई खर काट्दै थिए । केही खर काटेर पुन खोलापारी जाने क्रममा एक्कासी बाघले उनलाई आक्रमण गरेर सय मिटर पर लगेको थियो । निकुञ्जको हात्तीसहितको टोलीले हल्ला खल्ला गर्दै थारुको खोजी गरेपछि बाघ भागेको थियो। उनको शव क्षतविक्षत अवस्थामा पाइएको छ ।