साउदी अरबमा कोरोना संक्रमणको पछिल्लो अवस्था र अन्य जानकारी ।
१. विदेशमा अलपत्र परेका, रोजगारी गुमाएका, करार सकिएका विरामी परेका लगायतका नेपाली नागरिकहरुलाई स्वदेश फर्काउनका लागि नेपाल सरकारले गम्भीररुपमा विभिन्न चरणका गृहकार्यहरु गरिरहेको छ ।
माहामारीको यो घडी सबै मुलुकहरुका लागि सामान्य अवस्था भन्दा नितान्त फरक भएको हुँदा धनी, गरीब र मध्यम स्तरका मुलुकहरु सबैले होसियारी, सावधानी र जिम्मेवारीकासाथ विदेशमा अफ्ठ्यारोमा परेका आफ्ना नागरिकहरुको उद्दारका योजना बनाई क्रमशः कार्यान्वयनमा ल्याउँदैछन् र नेपाल सरकारले पनि सोही बमोजिम गरिरहेको छ ।
पछिल्ला दिनहरुमा राजदूतावासमा आउने फोनहरुमा धेरैजनाको जिज्ञासा उडान कहिले खुल्छ भन्नेमा रहेको पाइएको छ । नेपाल सरकारले उद्दार उडानहरु संचालनमा ल्याउने सम्बन्धमा गर्ने निर्णयलाई नेपाली राजदूतावासले सामयिकरुपमा जानकारी गराउने भएकाले उडान कहिले हुन्छ भन्ने प्रश्न सोध्नका लागिमात्र कृपया फोन नगरिदिनुहुन अनुरोध छ ।
२. नेपाली नागरिकहरुले उद्दार, स्वदेश फिर्ती लगायतका विषयमा टिपाएको विवरण राजदूतावासले कम्प्यटर प्रणालीमा राखी प्रथामिकताको आधारमा वर्गीकरण गर्ने गरेको छ । टेलिफोन उठाउने कुनै एक कर्मचारीलाई आफ्नो विवरण टिपाए पुग्दछ । तसर्थ, राजदूतावासमा आफ्नो समस्या टिपाउँदा एकैजना व्यक्तिले राजदूतावासका ३-४ जना सम्म कर्मचारीलाई फोन नगरी एकजना मात्र कर्मचारीलाई फोन गर्नुहुन अनुरोध छ । समस्यामा परेकाहरुले जतिसक्दो धेरै संख्यामा टेलिफोन गरी विवरण संकलनमा सहयोग गरिदिनुहुन पुनः अनुरोध छ । एकैजनाले पटक पटक फोन गर्दा आफूजस्तै समस्या टिपाउने अर्का नेपालीले मौका नपाउने हुँदा अरूलाई पनि मौका दिऔँ ।
३. आज मिति २०७७।०१।२४ (मे ६, २०२०) मा साउदी अधिकारीहरुले दिएको जानकारी अनुसार साउदी अधिराज्यमा कोरोना भाइरसबाट संक्रमितको संख्या ३१,९३८ पुगेको छ । आज थप १,६८७ जनामा संक्रमण भएको छ । कूल संक्रमितहरु मध्ये हालसम्म ६,७८३ जना निको भएका छन् । आज ९ जना सहित आजसम्ममा जम्मा २०९ जना संक्रमितको मृत्यु भएको छ । आप्रवासी कामदारहरुमा संक्रमणको दर उच्च देखिएकोले व्यापक सावधानीका लागि साउदी सरकारले अनुरोध गरेको छ ।
नेपाली राजदूतावास
रियाद ।
२०७७।०१।२४
सम्पर्कः (०११४६१११०८ कार्यालय समयमा, ०५५९३८९६०० (WhatsApp समेत), ०५०००३१७०५, ०५०००३४७८६, email: eonriyadh@mofa.gov.np
Discussion about this post