वैदेशिक रोजगार बोर्डले दूतावासलाई ७० लाख रुपैयाँ पठायो , विदेशमा खान बस्न समस्या भएकालाई

काठमाण्डौ – कोरोना महामारिका कारण विदेशमा समस्यामा परेका श्रमिकलाई खानेबस्ने व्यवस्था गर्न वैदेशिक रोजगार बोर्डले रकम पठाएको छ ।

मलेसिया, साउदी अरेबिया, संयुक्त अरब इमिरेट्स (यूएई) र बहराइनमा रहेको नेपाली दूतावासले माग गरे अनुसारको झण्डै ७० लाख रुपैयाँ परराष्ट्र मन्त्रालयमार्फत पठाएको बोर्डले जनाएको छ ।

कोरोनाको सङ्क्रमणको जोखिम बढ्सँगै काम रोकिदा, तलब नपाउदा र घर फर्कन नपाएका धेरै श्रमिकलाई अहिले खाद्यन्नको समस्या भएको छ । यी चार देशले श्रमिकका लागि खान बस्नको व्यवस्था गर्न रकम आवश्यक परेको भन्दै माग गरे अनुसारको रकम उपलब्ध गराएको बोर्डको भनाइ छ । 

वैदेशिक रोजगारीमा रहेका श्रमिकको राहत र उद्दारका लागि बोर्डले यसअघि पनि सहयोग रकम पठाएको थियो । मलेसियाले गैरकानुनी श्रमिकका लागि ल्याएको ‘ब्याक फर गुड प्रोग्राम’मार्फत स्वदेश फर्कने श्रमिकका लागि पनि मलेसियामा रहेको दूतावासले माग गरे अनुसारको रकम पठाएको बोर्डले जनाएको छ ।

अन्य गन्तव्य देशहरुमा आममाफी घोषणा हुँदा अलपत्र श्रमिकलाई स्वदेश फिर्ता गर्न सम्बन्धित देशमा रहेका नेपाली दूतावासको अनुरोधमा बोर्डले परराष्ट्र मन्त्रालयमार्फत रकम पठाउँदै आइरहेको थियो ।​

कोरोनाको कारण अन्तर्राष्ट्रिय उडान बन्द हुँदा घर फर्कन ठिक्क परेका श्रमिकहरु पनि परदेशमै रोकिएका छन् । विशेषगरी साना कम्पनीमा काम बन्द हुँदा श्रमिकलाई खाद्यन्न लगायत विभिन्न समस्या परेको त्यहाँ रहेका दूतावासले जनाएका छन् ।

साभार :- https://ujyaaloonline.com/ बाट