नेपाली राजदूतावास रियाद , साउदी अरबमा कोरोना संक्रमणको पछिल्लो अवस्था र अन्य जानकारी ।

साउदी अरबमा कोरोना संक्रमणको पछिल्लो अवस्था र अन्य जानकारी ।

१. आज मिति २०७७।०१।०६ (अप्रिल १८, २०२०) मा साउदी अधिकारीहरुले दिएको जानकारी अनुसार साउदी अधिराज्यमा कोरोना भाइरसबाट संक्रमितको संख्या ८२७४ पुगेको छ । आज थप ११३२ जनामा संक्रमण भएको छ । कूल संक्रमितहरु मध्ये हालसम्म १३२९ जना निको भएका छन् । आज ५ जना सहित जम्मा ९२ जना संक्रमितको मृत्यु भएको छ ।

थप नेपालीहरुमा संक्रमण भएको आधिकारिक जानकारीको सूचि प्राप्त भएको छैन ।
२. साउदी अरबमा कोरोना भाइरसको संक्रमण तीव्ररुपमा बढिरहेको छ । सबैको साथ नभएमा संक्रमण नियन्त्रण कठीन् हुने चेतावनी दिँदै सबै जिम्मेवार हुन साउदी अधिकारीहरुले अनुरोध गरेका छन् ।
यो संक्रमण आप्रवासीहरुमा पनि तीव्र हिसावमा बढेको हुँदा आफ्नो वरिपरी सम्पर्कमा आउने विदेशी नागरिकहरुसँग काम गर्दा, हिंडडुल, उठवस वा बजार गर्दा पूर्ण सावधानीका साथ गर्नुहोस् । एकअर्कावीच दुरी कायम गर्नुहुन र कुनै पनि व्यक्ति वा सरसामानहरुलाई अनावश्यक छुने वा स्पर्श गर्ने नगर्नुहोला ।

३. साउदी अरबको नगर तथा ग्रामीण मामिला सम्बन्धी मन्त्रालयले कोरोना भाइरसको संक्रमण नियन्त्रण गर्ने उद्देश्यले कामदारहरुको आवास क्षेत्रका लागि नयां नियम ल्याएको जानकारी प्राप्त भएको छ ।
सो अनुसार रोजगारदाता वा उसको कामदार आवासको सुपरभाइजरले आवासमा रहेका कुनै कामदारमा कोरोना सम्बन्धी कुनै लक्षणहरु देखिएमा अनिवार्यरुपमा स्वास्थ्य अधिकारीहरुलाई जानकारी गराउनुपर्ने छ ।
साथै, आवास क्षेत्र एवं खाना खाने क्षेत्रको अनिवार्य सरसफाइ गर्नुपर्ने छ । यी कार्यहरु जिम्मेवार भइ नगरेमा सुपरभाइजरलाई सा री ५ हजार देखि १० हजार सम्म जरिवाना हुने व्यवस्था गरेको छ ।

तसर्थ, स्वास्थ्य सम्बन्धी समस्या भएमा आफ्नो सुपरभाइजरलाई अनिवार्यरुपमा रिपोर्ट गर्नुहुन अनुरोध छ । सहयोग र समन्वय गर्नु उसको कानूनी कर्तव्य हो । सहयोग गर्न आनाकानी वा वेवास्ता गरेमा नजिकको प्रहरी कार्यालय, आफ्नो कफिल वा मानव संशाधन मन्त्रालयको सेवाग्राही नंवर १९९११ वा नेपाली राजदूतावास रियाद वा जेद्दा स्थित महावाणिज्यदूतावासमा सम्पर्क गर्नुहुन अनुरोध छ ।
————————
नेपाली राजदूतावास
रियाद ।
२०७७।०१।०६