अन्तरविद्यालय फुटबल मंसिर अन्तिम साता | ओडिसीमा बास्केटबल शनिबारदेखि | तेश्रो समृद्ध रुकुम चेस डिसेम्बरमा | धमला निर्वाचित

काठमाडौं । प्रथम वेस्ट काठमाडौं अन्तर विद्यालय फुटबल प्रतियोगिता मंसिर अन्तिम साता हुने भएको छ । वेस्ट काठमाडौं फुटबल क्लबको आयोजनामा हुन लागेको प्रतियोगितामा उपत्यकाका १६ विद्यालयलाई सहभागी गराइने क्लबका अध्यक्ष सुन्दर थापाले शुक्रबार आयोजित पत्रकार सम्मेलनमा जानकारी दिए । उनले खस्किँदै गएको फुटबलको स्तर बढाउन र ग्रासरुटबाटै दक्ष खेलाडी उत्पादन गर्न प्रतियोगिता आयोजना गर्न लागिएको जानकारी दिए ।

नयाँ नैकापस्थित फुटबल मैदानमा हुने प्रतियोगिताका खेलहरु नकआउटका आधारमा सञ्चालन हुनेछ । प्रतियोगिताका विजेताले ५० हजार, उपविजेताले २५ हजार रुपैयाँ पुरस्कार प्राप्त गर्ने छन् । यस्तै तेस्रो हुने टोलीले १५ हजार र प्लेयर प्ले टोलीले १० हजार रुपैयाँ पाउने छन् ।
प्रतियोगितामा उत्कृष्ट प्रदर्शन गर्ने खेलाडीमध्येबाट केही खेलाडी छनोट गरी नियमित प्रशिक्षण गराउने अध्यक्ष थापाले जानकारी दिए । वेस्ट काठमाडौं फुटबल क्लबले स्पेनको चर्चित क्लब एट्लेटिको म्याड्रिडसँगको सहकार्यमा हाल ८० जनालाई नियमित प्रशिक्षण गराउँदै आएको छ । उनले आगामी वर्षदेखि एकेडेमी सञ्चालन गरी पशिक्षण गराउने जानकारी दिए ।

ओडिसीमा बास्केटबल शनिबारदेखि
ओडिसी इन्टरनेसनल एकेडेमीको आयोजनामा १२ औं ओडिसी कप अन्तरविद्यालय बास्केटबल प्रतियोगिता शनिबारदेखि सुरु हुँदैछ ।
प्रतियोगिताको जुनियर ब्वाइजमा २४ तथा सिनियर गल्र्समा १६ टिमले भाग लिने ओडिसीका प्रिन्सिपल नारायण रोकाले शुक्रबार आयोजित पत्रकार सम्मेलनमा जानकारी गराए । गल्र्सको प्रतिस्पर्धा थ्री बाइ थ्री स्वरुपमा हुने छ । ब्वाइजमा एन्जल्स हर्ट तथा गल्र्समा भ्याली पब्लिक डिफेन्डिङ च्याम्पियन हुन् । फाइनल मंसिर १३ गते हुने छ ।

तेश्रो समृद्ध रुकुम चेस डिसेम्बरमा
तेश्रो समृद्ध रुकुम फीडे रेटिङ चेस प्रतियोगिता २४ देखि २८ डिसेम्बर रुकुम पूर्वमा हुने भएको छ । प्रतियोगिताको कुल पुरस्कार राशी ३ लाख ३ हजार रुपैया रहेको छ । प्रतियोगिताको उपाधि विजेताले ५० हजार, उपविजयीले ३० हजार तथा तेश्रो स्थान पाउने खेलाडीले २० हजार रुपैया पुरस्कार पाउने छन् । चौथो हुनेले १६ हजार, पाचौ हुनेले १५ हजार, छैटौ हुनेले १४ हजार, सातौ हुनेले १३ हजार, आठौ हुनेले १२ हजार, नवौ हुनेले ११ हजार तथा दशौ हुनेले ११ हजार रुपैया पुरस्कार पाउने छन् । महिला तर्फ शिर्ष स्थान पाउनेले ८ हजार, ६ हजार तथा ४ हजार रुपैया पुरस्कार पाउने छन् । प्रदेश ५का शिर्ष दुइ खेलाडीले ८ हजार र ६ हजार रुपैया पुरस्कार पाउने छन् । उत्कृष्ट स्थानीयले ८ हजार तथा उत्कृष्ट भेट्रान तथा अन रेटेडले पनि ८ हजार रुपैया पुरस्कार पाउने छन् । अन्य रेटिङ क्याटोगोरीमा उत्कृष्ट हुनेले पनि ८ हजार रुपैया पुरस्कार पाउने छन् ।

धमला निर्वाचित
नेपाल अन्तर्राष्ट्रिय तेक्वान्दो महासंघ (आईटीएफ) का अध्यक्ष अञ्जन धमला एसियाली आईटीएफ तेक्वान्दो महासंघको साधारण सभाबाट सदस्यमा निर्वाचित भएका छन् ।
नोभेम्बर १९ देखि २५ तारिखसम्म चीनको बेइजिङमा भएको साधारणसभामा ४५ राष्ट्रको सहभागिता रहेको धमलाले जनाएका छन् । धमला यसअघि दक्षिण एसियाली आईटीएफ तेक्वान्दो महासंघका उपाध्यक्ष थिए ।

नेपालमा हुने १३ औं दक्षिण एसियाली खेलकुद (साग) अन्तर्गत प्राविधिक समितिको पत्रकार सम्मेलन ः
मिति ः २०७६ साल मंसिर ७ गते, शनिबार ।
समय ः अपरान्ह १ः०० बजे ।
स्थान ः प्रचार प्रसार समिति, राष्ट्रिय खेलकुद परिषद्, त्रिपुरेश्वर ।