नेपालगन्ज ८ मंसिर । नेपालगन्जका सूचना अभियन्ता अधिबक्ता विश्वजीत तिवारी बेष्ट आरटीआई एक्टीभिष्ट आवार्ड २०१९ बाट पुरस्कृत हुनु भएको छ । फ्रिडम फोरम काठमाण्डौले पहिलो पटक यो आवार्ड नेपालगन्जका अभियन्ता तिवारीलाई प्रदान गरेको हो ।
देशभरिबाटै उत्कृष्ट रुपमा सूचनाको हकको क्षेत्रमा क्रियाशिल तथा यस क्षेत्रमा विशेष योगदान पुरयाए वापत फ्रिडम फोरमले आज राजधानीमा आयोजित एक कार्यक्रममा तिवारीलाई नगद रु २५ हजार सहितको सम्मान पत्र प्रदान गरेको छ । राष्ट्रिय मानव अधिकार आयोगका अध्यक्ष अनुपराज शर्मा र बरिष्ठ पत्रकार हरिहर विरहीले संयुक्त रुपमा उक्त पुरस्कार प्रदान गर्नुभयो ।
तिवारीले विगत एक दशकदेखि नेपालगन्जमा सूचनाको हकको अभियानलाई प्राथमिकताका साथ उठाउदै आउनु भएको छ । उहाँको नेतृत्वमा स्थापना भएको सूचना र मानव अधिकार अनुसन्धान केन्द्रले समेत सूचनाको हकका क्षेत्रमा विशेष काम गर्दै आएकाले आफ््नो पहिचान समेत बनाएको छ ।
संस्थाले सूचनाको हकलाई प्रमुख औजारको रुपमा प्रयोग गरि सुशासन कायम गर्नेतर्फ विशेष भुमिका निर्वाह गर्दै आएको छ । कार्यक्रममा कान्तीपुर दैनिकका पत्रकार कष्ण आचार्यलाई खोजमुलक पत्रकारिता आवर्ड र रेडियो नेपालका पत्रकार सुनिता रावललाई महिला शसक्तिकरण आवार्ड प्रदान गरिएको फ्रिडक फोरमका अध्यक्ष तारानाथ दाहालले बताउनुभयो । उहाँका अनुसार उनीहरुलाई पनि जनही रु २५ हजार नगदसहित सम्मान पत्रले पुरस्कृत गरिएको हो ।
Discussion about this post